شهر اكتوبر هو بالنسبة لنا شهر النصر والكرم والجود والعطاء والفخر والبهجة ولدي جموع المصريين ،، هذا العام تحديدا اكتوبر ٢٠٢٥ في مصر عامل ذي لعبة “الساقية العالية” ،، طلعنا فيه فوق ونزلنا فيه تحت ، بس واضح ان السرعة شديدة جدا ،، عذراً بالراحة شوية علينا يا شهر النصر مش هنتحمل كدا ،، مش واخدين علي كده ،، نبدأ مبتهجين باحتفالات اكتوبر ، و مفاوضات انهاء حرب وكارثة غزة وعودة الروح للمنطقة وتوقيع الاتفاق ، ونطلع بالروح المعنوية لحد فوق ،، وتزيد كمان سرعة الساقية وصعودنا لاعلي ندخل كأس العالم ، وناخد مقعد اليونيسكو ، والايزو ، ومنتخب سيدات الميني فوتبول يفوز بكاس العالم ومنتخب الطائرة جلوس يفوز بكاس العالم ،، وتطمن وانت قاعد فى العلالي حتي لو لحظات في “ساقية الملاهي” وتلاقي الدنيا ازهرت وتزينت وزهزهت معاك يا مصري يا أصيل ،، وتقول لنفسك خلاص ادلعلك يومين ما انت بقالك من ٢٠١١ شايل هموم الكون ،، ١٤ سنه خدمة شاقة وطالع من فوضي على اصلاح اقتصادي علي كورونا علي روسيا – اكروانيا علي حرب غزة علي السودان علي مشكلة الدولار والمياه و حرب تعريفة ترامب و٢٢ زيادة وقود وموجات تضخمية ،، افرح يا مصري يومين وخد نفس طويل علشان لسه المشوار طويل وانتشي يومين واجري في الملاهي كدا وبشرق علي ولادك بحساب ،، بل ريقك مؤقتاً،، زي ولاد الناس المستورين اللي عايشين فى المجرة ،، يقوم مشغل الساقية يرزعك قرار غلاء وقود في العضل تنزل الساقية من قمتها معنويا في لحظه وانت فوق شايف السماء لحد ما تلمس الارض احباط “ارتطام” ،، وتاني تاني يا اكتوبر يا شهر النصر ،، بس مش لازم بعد كل نصر ياسادة يكون فيه “ثغرة” ،،ما كنش ينفع يبقي اكتوبر بدون “ثغرة” ،، ثغرة ٧٣ كانت “الدفرسوار” ،، وثغرة ٢٥ كانت “رفع الاسعار” ،، بالله عليك يا عم يابتاع الساقية انا بحب البلد دي و تراب البلد دي ولحم اكتافي من خيرها وعاشق رئيسها البطل اللي شايل همومها ومنقذها وزعيمها تعالي انا وانت نساعده ،، دا راجل مصري اصيل لاخر لحظة بصوته بيتحمل مسؤولية “اللي مشغل الساقية” ومدير بيدافع عن فريقه علشان ما يكسرهمش اداريا بما فيهم اللي مشغل الساقية ،، ياعم يا مشغل الساقية رحمة بنا وبالقائد الكبير وبالشعب الجميل البطل ، مش هنتدخل في شغلك بس راعى التوقيت ،، ادينا فرصه بس نشم نفس النصر ونكمل مع بعض !! نود ان نتخلص من كل انواع الثغرات ،، لان هناك طبقة فوق المتوسطة والمتوسطة تهرسهم الايام وينصهرون تحت عجلات قطار ثقيل الاحمال !!
